වැව් තලය පිසගෙන හමා ආපු සීතල සුළං රැල්ලේ රැදිලා තිබ්බේ සමන් පිච්ච මල් සුවදක්...
පිච්ච මල් පූජාව එදාට යෙදිලා තිබ්බ හින්දා ගමේ හැමෝම වගේ එකට සහභාගි වෙන්න පූජා නගරෙට ගිහින් තිබුණා. සිරිපාලට නම් එදා දවස රජ මගුල්. සිරිපාල රස්සාව විදිහට කරේ ත්‍රීවීල් දුවපු එක. මුල් කාලේ මිනිහටම කියල ත්‍රීවිල් එකක් තිබ්බේ නැති උනාට වික්‍රම මහත්තයාගේ ත්‍රීවිල් එක හයර් කරලා ඉතුරු කරගත්තු සල්ලි වලින් ලීස් කරලා මිනිහ කොහොමහරි ත්‍රීවිල් එකක් ගත්තා. ඒක ගත්තු මුල් කාලේ කුසුමාවයි කෙලීවයි දාගෙන මිනිහ ගම වටේම ගියේ හෙන උජාරුවෙන්....
ත්‍රීවිල් එක අරං මාස දෙකක් ගියේ නෑ කුසුමා අක්ක එහා ගමේ මිනිහෙක් එක්ක පැනලා ගියා. ගහෙන් වැටුණු මිනිහට ගොනා අන්න වගේ මේ සිද්ධිය වෙලා මාසයක් යන්න කලින් සිරිපාල අයියගෙ කෙලී ගමේ රස්තියාදුකාරයෙක් හින්දා බඩ උනා. මේ සිද්ධි දෙක සිරිපාල අයියගෙ මුළු ජීවිතේම කණපිට හැරෙව්වා.
හොදට හිටපු මිනිහා ඊට පස්සේ අමු බේබද්දෙක් උනා. ත්‍රීවිල් එක දුවලා හම්බෙන තුට්ටු දෙක ඊට පස්සේ ඉදන් ගියේ කසිප්පු නිමල්ගේ සාක්කුවට එහෙමත් නැත්නම් ටවුමේ බාර් එක අයිති නානාගේ සාක්කුවට.......
අද......
ගමේ මිනිස්සුන්ගෙන් වැඩිපුර හයර් සෙට් උන දවසක්.......
සරු දවසක්..............
සිරිපාල හවස බාර් එකට ගිහින් හොදටම සප්පායම් උනා. මදි පාඩුවට තව බෝතල් බාගෙකුයි බයිට් එකට බැදපු මාළු කූරි කිපදෙනෙකුයිත් අරගත්තා.බීපු තරම හින්දා පාර යන්තමට වගේ බොද වෙලා පෙනුනත් මිනිහ ස්ටාර්ට් කරපු ත්‍රීවිල් එක තාර පාරට හැරෙව්වා.
තාර පාර දිගේ ආපු සිරිපාල අයියගෙ රතු පාට ත්‍රීවිල් එක අටේ කනුව පහුවෙලා ටික දුරක් ගියාම හම්බෙන ගුරු පාරට හැරෙව්වා. වැව් කණ්ඩිය උඩින් වැටිලා තිබ්බ පාර පටන් ගන්න තැනම තිබුනේ ලොකු සුදු කොඩියක්.
මීට දවස් දෙක තුනකට කලින් වැවේ ගිලිලා මියදිච්චි නාලකවත් අනුෂාවත් මේ වෙනකොට ගමේ හැමෝටම අමතක වෙමින් තිබ්බා.
නාලක රස්සාව විදිහට කරේ ගාමන්ට් රස්සාව. ගමේ ඉදන් කොළඹ ගාමන්ට් ෆැක්ටරියක වැඩට යනකොට නාලකට යන්තම් දැලි රැව්ල ආවා විතරයි. ගෙදර දොර තිබ්බ ප්‍රශ්න නාලකව තවත් ඉගෙනගන්න එකෙන් දුරස් කරා. රස්සාවට ගිය දවසේ ඉදන් නාලකට ඕන කරේ තමන්ට බැරි උන දේ මල්ලිටවත් කරලා දෙන්න.
මල්ලිගේ අධ්‍යාපනයට ඕනි හැමදෙයක්ම නාලක කරලා දුන්නා. රස්සාව කරන තැන හොදට වැඩ කරපු හින්දා ටික කාලෙකින්ම නාලකට ප්‍රමෝෂන් හම්බුනා. බාගෙට හදල තිබ්බ ගේත් හොදට හදාගන්න නාලකට පුලුවන් උනා. මේ කාලේදී තමයි නාලකට අනුෂාව හම්බුනේ. අනුෂා රුවන්වැලිසෑය ලග නෙලුම් මල් වික්කා.
කොචර අග හිගකම් තිබුනත් නාලකගෙයි අනුශාගෙයි ආදරේට කිසිම දෙයක් ප්‍රශ්නයක් උනේ නෑ. ගෙවල් වලිනුත් දෙන්නටම කිසිම ප්‍රශ්නයක් උනේ නැති හින්දා පුංචියට වෙඩින් එකක් අරං ජීවිතේ පටන් ගන්න දවස් තුනකට කලින් තමයි මේ අවාසනාවන්ත සිද්ධිය උනේ.
අනුෂාට ඕන උනේ එදා උදේම නාලකත් එක්ක ඔරුවෙන් ගිහින් මල් නෙලාන ජය සිරි මා බොධීන් වහන්සේ වදින්න යන්න. උදේ පාන්දරම කාටත් හොරා සීතල වැව් තලේ ඔරුව හබල් ගාපු උන් දෙන්නා හීන මවන්න ඇති........ අනාගතේ ගැන....... ජීවිතේ ගැන.....කොච්චර දේවල් ද..........
ඒත්................
උදේ පාන්දර නාගන්න වැවට ගිය සිරිපාල අයියට හම්බුණේ උඩබැලි අතට පාවෙමින් තිබ්බ නාලකගේ ප්‍රාණය නිරුද්ධ සිරුර.... අනුෂාගේ මිනිය හොයාගත්තේ දවස් දෙකකට පස්සේ........ නාලකගේ අම්මගේ........... අනුෂාගේ අම්මගේ වේදනාත්මක කෑගැහිල්ල මුළු ගමේම හැමකෙනෙක්ගේම නෙතට කදුළක් ගෙනාවා.................
පාර අයිනේ තිබ්බ ලයිට් කණුවේ හැප්පෙන් නැතුව යාන්තමට ත්‍රීවිල් එක හරවගත්ත සිරිපාලට වැව් කණ්ඩිය උඩින් හමන හුළං පාරේ වෙනදා නොතිබ්බ අමුතු සීතලක් දැනුනා. බ්රේක් එකට තියන් හිටපු අතෙන් ෂර්ට් කොලර් එක හදාගත්තු සිරිපාල ත්‍රීවීල් එක තවත් රේස් කරේ වේගෙන් යන්න හිතාගෙන...
ඒ උනාට..........
වැව කන්ඩිය ඉවර වෙන තැනම තිබ්බ මහ කුඹුක් ගහ යට ඉදන් සුදු ඇදගත්ත ජෝඩුවක් ත්‍රීවිල් එකට අත දානවා දැකල සිරිපාල ත්‍රීවිල් එකේ වේගේ අඩු කරා.
"පූජාවට ගොහින් එන දෙන්නෙක් වෙන්නැ....... "
තමාටම කියාගත්ත සිරිපාල ත්‍රීවිල් එක කුඹුක් ගහ යට නතර කරා. මුණු දෙක හරියට පෙනුනේ නැතත් වෙනදටත් මේ විදිහටම කට්ටියව දාගෙන යන පුරුද්ද හින්දා සිරිපාලට වෙනසක් දැනුනේ නෑ.
"කොහේටද පුතේ යන්නේ...."
සිරිපාල ටිකක් ගොතගැහුණු ස්වරයෙන් ඇහුවත් ත්‍රීවිල් එකට ගොඩ උන දෙන්නගෙන් කිසිම උත්තරයක් හම්බුන් නෑ. ඔලුව දෙපැත්තට හොලවපු සිරිපාල ත්‍රීවිල් එක රේස් කරා..... කලින්ටත් වඩා හිරි ගඩු පිපෙන අමුතුම සීතලක් සිරිපාලට දැනුනා. ඒත් එක්කම ආවේ පුදුම නෙලුම් මල් සුවදක්...........
" පුදුම සීතලක් නේද පුතේ... හම්මේහ්......."
සිරිපාල උරහිස් සලිත කරමින් කිව්වත් පිටිපස්සේ උන් දෙන්නගෙන් කිසිම ප්‍රතිචාරයක් ආවේ නෑ............
ත්‍රීවිල් එකේ හෙඩ් ලයිට් දෙකත් විනිවිද නොයන තරම් ඝණ මීදුම් දුමාරයක් පරිසරය වසා ගනිමින් පැතිර යමින් තිබ්බ හින්දා සිරිපාල ත්‍රීවිල් එකේ වේගේ ටිකක් අඩු කරා. එතකොට තමයි සිරිපාල දැක්කේ පාර දෙපැත්තේ ඇදලා තිබ්බ වේලිලා යමින් තිබ්බ ගොක් කොළ පේලි දෙක. මේ තමන් වෙනදා යන පාර නොවෙන වග සිරිපාලට වෙරි මතේ උනත් තේරුම් ගියා. පරුෂ වචනයක් කියමින් ත්‍රීවිල් එක නතර කරගෙන එලියට බැස්ස සිරිපාලට මීදුම් පටලය අතරින් උනත් වටේ තිබ්බ සොහොන් ගල් අදුර ගන්න පුලුවන් උනා.
මර හඩක් මුවින් පිට කරන්න සිරිපාල උත්සහ කරත් කටින් කිසිම දෙයක් පිටවුනේ නෑ. ත්‍රීවිල් එකේ පිටිපස්සේ උන්නු යුවල එකිකෙකා තුරුල් වෙලා සොහොන් ගල් අතරින් පාවෙලා යනවා සිරිපාලට බොද වෙලා වගේ පෙනුනා.........
පසු කතාව :-
අනුශාගෙයි නාලකගෙයි එක ලග තිබ්බ සොහොන් කොත් දෙක ගාව සිහිසුන්ව වැටිලා උන්නු සිරිපාලව ගමේ මිනිස්සු හොයාගත්තේ පහු වෙනිදා දවල්....
ඊට ටිකක් එහා පැත්තේ නවත්තල තිබ්බ ත්‍රීවිල් එක සිරිපාල මහ රෑ කොහොම එතනට එළවන් ආවද
කියන්න කාටවත් පුළුවන් උනේ නෑ...
දවස් දෙකකට විතර පස්සේ කට්ටඩියෙක්ගේ පිහිටෙන් ගොඩ ආපු සිරිපාල කිව්ව කතාව ගමේ ගොඩක් අය විශ්වාස කලේ නෑ...... බීපු මිනිහෙක්ගේ විකාරයක් කියල අහක දැම්මා.....
ඒත්....
දෙතුන් පාරක්ම ගමේ කිහිප දෙනෙක්ම මේ සිද්ධියට මුහුණ පෑවට පස්සේ ගොම්මන් වෙලාවට වැව් කණ්ඩිය පැත්තේ යන්න කව්රුත් ඉදිරිපත් උනේ නෑ........
අදටත්.........
පිච්ච මල් පූජාව දවස් වලට ඒ දෙන්න ඉන්නවලු කුඹුක් ගහ යට....... තුරුල් වෙලා....... මේ ආත්මෙදි එක්වෙන්න බැරි උන වේදනාව හැමෝටම කියන්න බලාගෙන...........
